SHILLONG: 1999 bilsini Kargil War-o an·tangtangko on·kange sianggipa sipairangko gisik ra·na gita mijal Sombar salo, Kargil Vijay Diwas-ko Meghalaya a·dokoba maniangaha. 1999 bilsio Jammu & Kashmir a·dokni Kargil-Drass sector-o Pakistan a·songni napdrabaaniko champengsoe, India a·songni ning·o donggipa biaprangko man·pilahani gimin aro ia Kargil war-o a·songtangna dakgrike janggitangtangko gimaatna nanggipa sipairangko gisik ra·pilskana gita bilsiantian July-ni 26 tariko ia Kargil Vijay Diwas-ko a·song gimikon manirongengachim.
Indake ong·engon, ia chang 22-gipa Kargil Vijay Diwas-ko Meghalaya a·doko manianio a·dokni Chief Minister Conrad K Sangma aro 101 Area-ni Lt Gen KC Panchanathan (AVSM) GOC, Meghalaya a·dokoni re·ange janggitangtangko a·songna on·kangahani gimin Capt KC Nongrum aro Maj David Manlun KC (P)-na dingtangmancha mande ra·pilskaani chin gita Shillong songjinmani Rhino Heritage Museum-o tarie dongipa uamangni bimangrango pul malarangko pate, bi·chakanirangko dakangaha.
Ia salni bako a·dokni Chief Minister, dingtangmancha sianggipa matgrik sakgnini nokdangrang baksaba agangrikangjolaha.
Iani ja·man, Eastern Air Command-ni AOC-in-C Air Marshal Amit Dev (AVSM, VSM), GOC 101 Area-ni Lt Gen KC Panchanathan (AVSM) aro Assam Rifles-ni Director General Lt Gen PC Nair (AVSM, YSM), dingtangmancha Rhino Prerna Sthal-o, sianggipa sipairangna pulrangko aro malarangko done mande ra·pilskaaniko dakangaha.
