TURA: West Garo Hills a·jani Dalu jolo donggipa me·chik bi·sa saksako 2018 bilsionin uni manitanggipa Shillong-ona rimangani ja·man, uko ka·saninggija dake jakkalan baksana uni mamatanggipa uko drae til·ekahani gimin Association for Democracy & Empowerment (ADE) dol, ia nokdangni kosako raken jegalataha aro ia nokdangni manderangko rim·e nanga gita sastirangko on·china dabiangaha.
Koborko on·ani gitade, Dalu Boruapara songni me·chik bi·sa saksako uni manitanggipa, 2018 bilsion Shillong-o poraiatna ine an·tang baksa Bishnupur-o dongchina rimangahachim indiba Shillong-o ia me·chik bi·sako uni manitanggipa kragija dake doke sate roan baksana uni mamatanggipaba uko changni chang drae til·ekaha. Mamatanggipani jako drae til·ekako man·e ia me·chik bi·sa changgittamna kingking an·o dongaha aro uko uamang changni chang bi·sa galate roaha.
Ia me·chik bi·sa baksana gipin sakbri me·chikrangkoba ia jiksesa an·tangtangni noko done kragija dake jakkalenga ineba ia me·chik bi·sa kobor ra·timgiparangna parakaha.
Indake ong·engon, me·chik bi·sarangko iandake kal·ake roengani gimin ia jiksesani kosako ADE matnangatenba, uamangni rim·e donenggipa gipin me·chik sakbrikoba jokatchina didiataha.
Mikkangchi iandake me·chik bi·sarangni kosako ong·gija dakanirangko nikna nangjana gita ia jiksesako rim·e rakbatgipa sastirangko on·china gitaba ADE didiataha.
“An·chingni songsalo me·chik bi·sarangko iandake jakkalanirangko an·ching nikna man·rongenga. Uni gimin mikkangchi iandakgipa kamrangko chel·chakna man·na gita dos dakgipa manderangni kosako rakbatgipa sastirangko on·e mesokna nangenga,” ine ADE-ni president Dalseng Bira Ch Momin parakataha.
