TURA: Sombar salo Garo Hills Autonomous District Council (GHADC)-ni Chief Executive Membor (CEM) Benedic R Marak, New Delhi-ona re·angenba, Garo Hills-na tangka paisarangko chamatchina gita union minister sakgittamko gronge agangrikangaha.
Batanggimin bilsirango GHADC-ko dilgiparangni tangka paisarangko jakkalsretani a·sel tangka paisani gita neng·nikanirangko man·an baksana kam ka·giparangnaba indita jarangni dormaharangko on·na man·kujaengachim ine nikna man·a.
Indake ong·engon, GHADC-o gital administrative building-ko aro staff quarter-rangko rikna gita tangka paisarangko dakchake on·atchina gita GHADC-ni CEM, ma·mong sorkariko didiangaha.
Union Minister-rangko grongeani somoio CEM baksana GHADC-ni Executive Membor Promod Koch aro uni chief adviser Akki Sangma-ba dongpae bak ra·angaha.
Skanggipao GHADC-ni CEM, Union Law & Justice Minister Kiren Rijiju-ko uni office chamber-o grongeaha aro GHADC-ni main district council court aro dingtang dingtang village court-rangko rikna gita tangka paisarangko chamatani bidingo agangrikangaha.
Uni ja·man ua Union Tourism aro DoNER Minister G Kishan Reddy-ko gronge, GHADC-ni gital council administrative building baksana staff quarter-rangko riktaina tangka paisarangko chamatani bidingo agangrikangskaaha. GHADC-ni gitcham administrative building da·o bilsi 100 gapangna sipilengahani a·sel nokni obosta namangjaengahani gimin gital building-ko rikskana ua tangka paisarangko chamatchina Union Minister-ko didiangaha.
Gittamgipao GHADC-ni CEM, Labour & Employment aro Petroleum & Natural Gas-ni Union Minister of State Rameswar Teli-ko grongeskaaha aro Garo Hills-o gas cylinder-rang chu·ongjaengani a·sel manderang neng·nikanirangko chagrongna nangengani gimin Union Minister baksa agangrikangaha.
Garo Hills-ni songadam nokadamrango donggipa manderangna nambata sanna bananirangko on·na man·na gita ESR hospital-ko songe on·china gitaba ua Union minister-ko didiangaha.
