EGH-o Atharv Welfare Society-ni Seminar-ko ong·atanga

TURA: Re·anggipa Budbar salo, AYUSH Ministry-ni ning·o donggipa Atharv Welfare Society-ni seminar-ko East Garo Hills a·jao ong·atangaha aro ia seminar-ko ong·atanio East Garo Hills a·jani District Medical & Health Officer Dr IA Sangma, District Maternal & Child Health Officer Dr LM Sangma, Williamnagar Civil Hospital-ni Homeopathic Doctor Dr Paulson M Sangma, Songsak-ni Homeopathic Doctor Dr Abu Sayed, West Garo Hills a·jani Homeopathic Doctor Dr Seba Rani T Sangma, Lucknow-o donggipa Atharv Welfare Society-ni State Programme Manager Bhidyak Paul aro gipinrangba dongpae bak ra·angaha.
Ia Seminar-ko ong·atanio AYUSH Ministry-ni ning·o donggipa Atharv Welfare Society-ni bidingo State Programme Manager Bhidyak Paul, jinmana agan-talate on·angaha aro uni ja·man AYUSH-ni bidingo East Garo Hills a·jani DM&HO Dr IA Sangma talate on·angskaaha.
Ia Atharv Welfare Society-ko East Garo Hills a·jaoba a·bachengatengahani gimin ia society-o kam ka·na sienggipa manderangnaba DM&HO-ni jakchi, appointment letter-rangko suale on·angjolaha.
Bon·kamao mittelpilani kattarangko District Program Manager Ghawee Jaksilchi Sangma aganangskaaha.
Ia sal somoirango COVID-19-ni giproroaniko champengna dongimin niamrang dongani gimin ia tom·anio sak 30-na batgija manderang bakko ra·angaiaha aro dingtang dingtang niamrangko ja·rike tom·aniko ong·atangaha ine u·iataha.