NGH-o mande saksako silchidare baksa rim·a

TURA: Ja·manchake koborko man·soani gitade, re·anggipa Mongolbar salo, North Garo Hills a·jani police-rang, mande saksako silchidare aro guli baksa Bajengdoba bazar-oniko rim·na man·aha.
Police-rangni u·iatani gitade, mande saksa Bajengdoba jolo ong·gija kamrangko ka·na silchidareko ra·bite roramenga ine koborko man·soani ja·man police-rang, ua biapona re·ange ia mandeko Bajengdoba bazar-oniko rim·na man·aha.
Ia mandeko rim·ani ja·man sandion, uoniko silchidare (pistol) pongsa baksana guli rongsako police-rang man·aha ineba u·iataha.
“Ia mandeko chinga rim·e uni kosako mokordomako ka·aha,” ine North Garo Hills a·jani police official-rang parakataha.
Ia apsan walon, West Garo Hills a·jaoba mande sakgittamko Gondagre songni manderang, dakait dakna jotton ka·engmiting somoio rim·e ja·mano police-rangna pakwate on·atahachim. Ia mande sakgittamoniko songni manderang pistol pongsa aro atte pongsako man·ahachim.