TURA: Sombar walo, West Garo Hills a·jani New Bhaitbari jolo wa·al kamanichi manderangni dongchakgipa nok te·sa aro dokkan ge·gni kamchapako man·aha.
Wa·al kamako man·gipa nok aro dokkan ge·gniara New Bhaitbari-o donggipa Saha nokdangni ong·achim.
Wa·al kamanio ia nokdangni nangchongmotgipa lekkarang aro gong 30,000 tangkarangko man·chape ma·manti gam-jinrangko kamchapaha ine kobor on·aha.
Da·o dipet wa·al kamchakatani a·sel ma·sina gita am·sandienganirangko dakengkua ine u·iatengon, bijoli kamsotani a·selba ia nok aro dokkanrangko wa·al kamahakon ine kobor on·timgiparang parakataha.
Wa·al kamani ja·man Phulbari-oni wa·al kimitgipa sipairang, ua biapona re·ange wa·alko kimitna gita nangaha ineba kobor on·aha.
Wa·al kamako man·gipa nokdangoni u·iatani gitade, wa·al kamanio komibeoba gong lak 15-mangni gita noksan ong·atako man·na nangaha.