TURA: Ro·ong salruragipa truck garirangoniko Mahendraganj Exporters Association-ni secretary aro National People’s Party (NPP)-ni gitcham candidate Sanjay A Sangma, tangkarangko gile ra·enga ine matnanganiko Zikzak constituency-ni MDC aro Mahendraganj Exporters Association-ni membor Aktar Ali jegalatenba, ia badiaba dolrangni association-ni secretary-ko biming man·atna tol·e matnanganisan ong·aia ine talataniko on·angaha.
“Anga Zikzak GHADC constituency-o seokako man·gipa MDC aro Mahendraganj Exporters Association-niba membor ong·e Mahendraganj-o ong·enga obostarangko namen ma·sigipa ong·a. Association-ni secretary Sanjay A Sangma, ro·ong salruragipa truck garirangoniko tangka gile ra·enga ine matnanganiranga kakket ong·ja aro ian badiaba dolrangni uni bimingko ong·gija dake man·atna jotton ka·anisan ong·aia,” ine Ali talatangenba, da·o dipet ro·ong salruragipa garirangoniko association-ni secretary ba gipinrang tangka gile ra·a dongja ine parakataha.
Ro·ong salruraengani a·sel ramarang nosto ong·atako man·enga ine matnanganikoba Zikzak MDC jegalataha aro da·o dipet ro·ong salruragipa truck garirang, Police department-ni dongimin niamrangko ja·rikesa salenga ine talataniko on·angaha.
Tangka gile ra·enga ine matnanganiko apsan daken Mahendraganj Exporters Association-ba jegalataha aro ian badiaba dolrangni tol·e matnangna jotton ka·anisan ong·aia ine talataniko on·angaha.
“Association-ni secretary Sanjay A Sangma-ko matnange songbadrango seani ja·man chinga Mahendraganj-ni GHADC IB-o tom·e chanchirimangaha aro iani bidingo talataniko on·na manchiangaha. Da·o dipet ro·ong salruragipa truck garirangoniko association-ni secretary ba gipinrang tangka gile ra·a dongkuja,” ine Mahendraganj Exporters Association-ni president parakataha.