E-Champ-ko a·bachengatanichi a·doko bading chiwalgipa bang·baroroenga: CM

TURA: Chief Minister-ni E-Championship Challenge-ni ning·o seokako man·gipa Cohort-1 entrepreneur-rangni graduation ceremony aro Cohort-2 entrepreneur-rangni on-boarding ceremony-ko Mongolbar salo Tura jilla-ni Tree House Resort-o ong·atangaha aro ia program-ko ong·atanio Meghalaya a·dokni Chief Minister Conrad K Sangma-ba dongpae bak ra·angaha.
Ia program-ko ong·atanio a·dokni Chief Minister jinmana aganprakangengon, ia E-Championship Challenge-ko a·bachengatanichi bading chiwalanio gisik nanggipa manderangko ong·katatna man·e da·o a·doko bading chiwalani kamrangko ka·na ong·atenggipa chadamberang bang·baroroengaha ine parakangaha.
A·doko bading chiwalgiparangko tang·doatna aro dingtang dingtang cholrangko on·na gita sorkari on·kange kamko ka·enga ine janapatengon, bading chiwalani kamrangchi, a·dokni gamchatbegipa gam-jinrangko jakkalchina gita Chief Minister, chadamberangko didiangaha.
Ia E-Championship program-ko a·bachengatanichi batanggimin bilsignini gisepon chadamberangni changa sapanirangko aro bilrangko dingtang dingtang kamrango jakkalna man·aha ineba Chief Minister aganaha.
Chief Minister-ni aganani gitade, ia E-Championship program-ko a·dok sorkari, bading chiwalanio gisik nanggipa chadamberang, jemangan kamtangtangko a·bachengna gita chol ong·jaengachim, uandakgipa manderangna a·bachengataha.
“Ia e-Championship program-chi chinga nambatgipa bading chiwalani cholrangkoba sandina man·enga aro bading chiwalgiparangni kamrangkoba tang·doatna man·enga. Bading chiwalgiparangni kamrango tang·doataniko man·na gita dakchakanirangko on·enga,” ine Sangma aganaha.
Ia program-ko ong·atanio E-Championship 2020 batch Cohort-1-ni entrepreneur-rang ba bading chiwalgiparangba, ia program-o donge an·tangtangni skie ra·gimin kamrangni bidingo gipinrangna agan-talate on·angskaaha aro ia program-ko sorkarini a·bachengate on·aniara a·doko bading chiwalaniko aro chadamberangni changa sapanirangko tang·doatna dakchakani ong·gen ine parakangtokaha.
Ia e-Championship Challenge-o bakko ra·pana man·ahani giminba uamang dingtangmancha a·dok sorkariko aro Chief Minister-ko mittelpilangaha.