SHILLONG: Meghalayaona songre songbatna sikgipa manderangna re·baenggipa September 1 tarikoni oe on·gnok.
COVID tikka ponggni su·mangiminrangnasan a·dokko jakgitele oe on·aikugen, unigisepon pongsa su·gimin aro su·srangkugijagiparangnaba re·banade chol on·gen inidba uamangde konta 72-ni gisepo RT-PCR, TRUNAT ba CBNAAT test-ni negative report-ko mesokskana nanggen ine Chief Minister Conrad K Sangma aganaha.
Meghalayaona songreba tourist-rang, re·bana skang online gita book ka·na ba a·kangchengna nanggen. Songrebagiparang pilakan komibeoba walsade jeba hotel ba guesthouse-rango dongangtelna nanggen aro uamangni chu·gimik dakgnirangko mesokangna nanggen.
Ungisepon, saniba nokona ba mandeona re·baa ong·ode, ua mandeni chu·gimik address aro contact-rangko mesokna nanggen.
Indake ong·engon, ponggni ba pongsa tikka su·gimin a·doktangni manderangkode tourist spot-rangona napna gita on·gen. Indakoba a·doktangni manderang ong·genchimoba, tikka su·kugijagiparangde RT-PCR, TRUNAT aro CBNAAT test-ni negative report-ko mesokna nangskagen.
Chu·gimik protocols ba dakgnirangko Deputy Commissioner-rang paltangtang gita on·anggen aro joltangni authority-rangba uamangni biap a·damni kri protocol-rangko ra·gate on·anggen.
