SHILLONG: Umngot Hydro Electric Project-ko a·dok sorkari jako ra·e ka·na nangnikanirang dongja aro ia project-na skango soi ka·gimin Memorandum of Understanding (MoU)-koba den·galpilaha ine Sombar salo, Meghalaya a·dokni Power Minister James K Sangma parakataha.
Power Minister-ni parakatani gitade, Meghalaya a·doko bijoli chu·ongjaengani gimin bijoli man·aniko bariatna gitasa sorkari kamrangko ka·enga aro da·o dipet ia Umngot Hydro Electric Project-ko sorkari jako ra·e ka·angna gita maming miksonganirang dongjachim.
“A·doko bijoli chu·onggijaniko namatna gitasa sorkari kamko ka·enga aro iakosa manderang Umngot hydro project-ni kamko ka·enga ine ma·sisretengakon. Da·o dipet chinga ia project-ko be·en pil·atna nangnikanirang dongja,” ine Sangma talataniko on·angaha.
Ia Umngot hydro electric project-ko sorkari jako ra·e ka·genchimode nangchakegipa dolrang baksa sorkari agangrikchenggenchim ineba Sangma aganaha.
A·doko bijoli man·aniko bariatna sandienggipa cholrangni gimin talatangengon, bijoliko bikotna gita sorkari, wind, solar aro uandakgipa gipin hydro project-rangkode nienga ine Power Minister parakataha.
Batanggimin somoirangoba ia Umngot hydro electric project-ko jegalenggipa joint action committee-ni dilgiparang, Power minister aro dingtang dingtang minister-rangko grongenba, ia project-ko ra·galchina gita didiangahachim ine nikna man·a.