Mal salrura, badinggipa dol, niam grigipa weighbridge-rang bidingo CM-na lekka seata

SHILLONG: Trak gari salgiparang, mal salrura-giparang, badingchiwal-giparang nangrime, NH-6, NH-40E-o niam grigipa weighbridge-rangko chip-china Meghalaya-ni CM-ko didiaha. Truckers, Suppliers, Exporters, Traders aro Transporters Association-ni Joint Action Committee, NH 6 aro NH 40E-ni pilak niam grigipa weighbridge-rangko chipchina didie Meghalaya chief minister Conrad K Sangma-na lekka seataha. Merongrangko salna aro ba·ra-kanchaoni sam-rang, rika-dakani malrango-na pilak nanga malrangko a·songni songgadam biaprangona salna uamang daito ong·a, ‘‘Chingni kam namen neng·begipa ong·a aro India-ko aro a·dokni tangka-paisako dakchakna mingsa mongsonggipa ong·a,’’ dilgipa saksa aganaha. Meghalaya Truckers Union-ni president, Meghalaya Traders Association-ni general secretary aro Transporters Association, East Jaintia Coal Suppliers Association-ni secretary aro Meghalaya Commerce-ni Foreign Trade Chamber-ni president chittio nangrime soi ka·aha. “A·doko me·rong-mechurangko babilsi ge·anti-ge·prakna sokat-enga aro kangal-cha·a siako champengenga, chinga jarangna ku·cholsan kam ka·angkuna nanggen aro chingni nokdang aro bi·sarangoni chel·e dongna nangkugen.’’ “Coronavirus-oni nal-jokna an·senge dongna a·gilsak gimik noko dongchina aganachim ian chingna neng·begipa somai ong·a, chinga noko dongna man·ja aro chingni nokdang aro ka·sarangko naljoke rakkina nanga,” CM-na segipa chittio janapaha. Meghalaya a·doko bang·a neng·nikani baksa re·draenga, weighbridge-rangko NH 6 aro NH 40E-ni bang·a biaprango done chingni songreanio gisik saatmanchaa ine committee aganaha. “Changanti chinga jako tangka bang·e ra·bite ua weighbridge-rang gita re·na nanga ong·jaode janggi tangani cholan dongja. Ua weighbridge-rangni a·sel tangka dong-japila indake adita sal-rangna ia somaio chinga okkrie dongna nangaha.’’ “Ua pilak weighbridge-rangko India aro ma·mong sorkari niam gri ine parakataha. National Highway-rang ma·mong sorkarini gamrang ong·a aro jean ma·mong sorkarini ning·o chu·gimik ong·a National Highways Act ine dingtang Act-chi chalai-enga, committee aganaha. Act-ko MV Act-ni ning·o niam grigipa weighbridge-rangna tariaha, National Highways Act-chi chalaigipa pilak highway-rangna ong·ja aro ma·mong sorkari baksa Act-ko kam ka·enga aro a·dok baksa ong·ja. “Niamni kosako ong·a aro Indian Constitution-ni gita ong·ja uni gimin chingni a·songko niam gri rikjana maina songpang-giparangni daito ong·a, committee, janapaha.