SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otgalani bidingo judicial inquiry-ko dakchina sorkari ge·etahaoba, da·onan inquiry-ko a·bachengkujaenga.
HNLC-ni gitcham dilgipa Cheristerfield Thangkhiew-ko re·anggipa August-ni 13 tarik pringwalo, police-rangni so·otani ja·man manderang, police-rangni kamko jegalgrimtokahani gimin sorkari, iani bidingo judicial inquiry-ko dakchina ge·etangahachim.
Bristibar salo a·dokni Chief Secretary MS Rao-ni u·iatani gitade, ia inquiry-ko dilna songako man·gipa gitcham Justice T Vaiphei, da·o dipet a·doko dongja aro ua September-ni 9 tarikosa a·dokona re·bapilengani gimin uni sokbaahaon, ia inquiry-ko a·bachengatgnok.
Ia inquiry-ko dilna gita Meghalaya Human Rights Commission (MHRC)-ni chairman-ko songahani gimin HNLC-ni gitcham dilgipako so·otani bidingo inquiry-ko dakanio mandena on·gimin bilni gitaba am·sandianirangko dakna siengachim.
Ia inquiry-ko dakani bidingo talataniko on·angengon, ia inquiry committee-na sorkari chu·gimik jakgitelaniko on·gen ine adita salrangna skangsan a·dokni Chief Minister Conrad Sangma parakatahachim.
HNLC-ni gitcham dilgipako police-rangni so·otani ja·man, jakgitele inquiry-ko dakna man·na gita a·dokni DGP aro gipin police officer sakgniko kam dontongatchengchina gita Mawlai jolo songdongenggipa manderang dabitokengachim.