TURA: Bilsianti September jao manirongenggipa Rashtriya Poshan Maah-ko West Garo Hills a·jaoba Sukrobar salo, West Garo Hills a·jani Chongnapara Purakhasia-o donggipa Bilcham CLF Office-o a·bachengataha.
Rashtriya Poshan Maah-ko a·bachengatani somoio West Garo Hills a·jani Additional Deputy Commissioner aro DRDA-ni Project Director CN Sangma, mongsonggipa sokgipa ong·e jinmana aganprakangengon, ia program-ko ong·atna nangani nangchongmotani gimin aro mandeni dal·roroanio namgipa cha·anirangko cha·na nangani gimin aganangaha.
Sok kanenggipa me·chik aro bi·sarangni an·seng baljoke dongna nangani gimin aganangengon, ma·giparangan nokdangni janggil bolgro gita ong·ani gimin ma·giparangni an·seng baljoke donganiara namen nangchongmotgipa ong·a aro ma·giparang an·seng baljoke donggenchimode nokdang aro songsalba namroro silrorona man·a ine Sangma aganaha.
Ia Poshan Maah-ko jagimikna manianio dingtang dingtang program-rangko ong·atanggen, jeon Anganwadi aro ASHA worker-rang, department-ni pal kamrangko ka·dilanggen ine janapatengon, ia program-rangko chu·sokgipa ong·atna gita manderang pilakan bakrimaniko on·gen ine Sangma, an·tangni ka·dongchakenganiko parakangaha.
Ia sal somoirango COVID-19 batrikrikengani gimin tika su·e ra·na chol ong·gipa manderang pilakkon tika su·e ra·china gitaba ua ia tom·anio didiangaha.
Ia salo Poshan Vatika-ni bak gita dingtangmancha komila chararangkoba ge·angaha aro apsan somoion Poshan Walk-koba ong·atangaha.
Ia program-ko ong·atanio dongpae jinmana aganprakanggipa gipin manderangara, Dalu C&RD Block-ni BDO Dr U Sangma, DAY NRLM-ni DPM Michelle Momin, Tura Urban ICDS Cell-ni CDPO Chonseng Arengh, Purakhasia PHC-ni Medical Officer Dr Cara Sangma aro gipinrang ong·a.
