SHILLONG: Meghalaya a·doko game ge·e cha·enggipa manderangni neng·nikanirangko a·dokni Governor Satya Pal Malik, ma·mong aro a·dok sorkariona ra·angenba agangrikna sienga.
Mongolbar salo Hill Farmers Union (HFU)-ni dilgiparang, a·dokni Governor-ko grongenba, game ge·e cha·enggipa manderangni chagrongna nangenggipa neng·nikanirangko agan-janape on·angaha.
Governor-ko grongani ja·man, kobor ra·timgiparang baksa agangrikengon, a·doko game ge·e cha·enggiparangni dingtang dingtang neng·nikanirangko a·dokni Governor, ma·mong aro a·dok sorkariona ra·ange agangrikna ku·rachakataha ine HFU-ni president Commander Shangpliang parakataha.
A·doko game ge·e cha·enggiparangni mingdok neng·nikanirangko HFU, a·dokni Governor baksa agangrikaha aro ua ia neng·nikanirangko sorkari baksa agangrikna ku·rachakaha ineba Shangpliang parakataha.
HFU president-ni parakatani gitade, a·doko COVID-19 giproroani a·selba game ge·e cha·enggipa manderang neng·nikanirangko chagrongna nangtokengachim.
Lockdown-ko ra·gatanichi game ge·e cha·giparang, nokdangtangtangko chalaianio bang·a neng·nikanirangko chagrongna nangtokengoba a·dok sorkarioniko maming dakchakanirangko man·jaenga ineba Shangpliang parakataha.