AMPATI: South West Garo Hills a·jani Betasing Block-ni ning·o donggipa dingtang dingtang songrango mitam manderang, COVID-19-ni tikarangko su·na jechaktokengani gimin Sukrobar salo, South West Garo Hills a·jani Deputy Commissioner Ch Ramakrishna aro Betasing Block War Room-ni official-rang baksa dingtang dingtang songni nokmarang, VEC secretary-rang, self help group (SHG)-rang aro dingtang dingtang dolrang, tom·aniko ong·atangenba, ia COVID-ni tikako su·e ra·na nangchongmotengani gimin aro manderangni ma·sisretanirangko chel·atna gita agan-talate on·angaha.
Ia tom·aniko Betasing Block War Room-ni gita, chong·motan Betasing Block-ni BDO WRG Momin, medical officer-rang, sector magistrate-rang aro gipin kam ka·giparang ong·atangaha aro ia jolrango songdongenggipa bang·bata manderangan tikarangko su·na jechaktokengani a·sel tika su·e ra·na chol man·enggipa manderangko chu·gimik tika su·na man·kujaengani gimin a·selrangko sandiangaha.
Ia tom·anio saksangrik dakeba agangrikna cholko on·angaha jeon, nokma aro songni gipin manderang, ia tikani bidingo jangbingbangenggipa kattarangni a·sel tikako su·na kentokenga ine paraktokaha.
Ia tom·anio South West Garo Hills a·jani Deputy Commissioner Ch Ramakrishna, jinmana aganprakangengon, uamangni mikkango dongenggipa pilak officer-rangan COVID-ni tikarangko su·e ra·tokaha indiba uamangna mamingba ong·jaenga ine songni manderangna ka·dongatani kattarangko aganangaha.
South West Garo Hills a·jao tika su·aniko chu·gimik 100 percent matchotahaode lockdown-rangko ra·gatani dongjawaha aro dokkanrangkoba chu·gimikkon kulina on·gnok ineba Deputy Commissioner didianiko on·angaha.
