TURA: Pedaldoba primary health centre (PHC)-na dakchakgipa doctor-ko on·china gita Pedaldoba-ni Garoland State Movement Committee (GSMC), sorkario dabiangaha.
Iani bidingo Meghalaya a·dokni Health & Family Welfare Minister James K Sangma-na sedoatengon, Pedaldoba PHC-o da·o dipet doctor saksasan ong·e saenggipa manderangko sannanio neng·nikanirangko chagrongna nangenga ine GSMC Pedadoba regional unit parakataha.
GSMC Pedaldoba unit-ni parakatani gitade, da·o gita COVID-19 giproroani somoirangoba Pedaldoba PHC-o kamko ka·enggipa doctor saksansa manderangko sanna banna gita nangenga aro uandaken COVID man·giparangko aro gipin sagiparangko nirokanioba ua neng·nikanirangko man·na nangengachim.
“Ia PHC-o doctor saksan ong·e ua konta 24 kamko ka·na nangao ga·akenga aro uandaken ia doctor aro sagipa manderangba neng·nikanirangko man·rongna nangenga. Uni gimin Pedaldoba jolrango songdongenggipa manderangna nambate sanna bananirangko on·na man·na gita ia PHC-na dakchakgipa doctor saksako on·dapchina chinga mol·molenga,” ine GSMC Pedaldoba unit-ni dilgiparang parakataha.