TURA: Jolni chadamberangna aro me·chikrangni self help group (SHG)-rangna District Commerce & Industries Centre (DCIC)-ni ning·o ra·gate on·gipa dingtang dingtang scheme-rangni bidingo talate on·na gita re·anggipa September-ni 17 aro 20 tarikrango dingtangmancha awareness program-ko South Garo Hills a·jani Nongalbibra Community Hall-o ong·atangaha.
Ia awareness program-ko South Garo Hills a·jao donggipa Nongalbibra Tourism Society baksa nangrime ong·atangaha aro ia program-ko ong·atanio Nongalbibra Tourism Society-ni president Digros D Shira, jinmana aganprakengon, kamgri ong·e dongenggipa chadamberangna aro me·chikrangni SHG-rangna janggi tangani cholrangko on·na miksonganio ia scheme-rangni bidingo talate on·na gita ia program-ko ong·ataha ine parakangaha. Ia program-ko ong·ate jolni chadamberangna aro SHG-rangna dakchakanirangko on·engani gimin ua dingtangmancha South Garo Hills a·jani DCIC-koba mittelpilangaha.
Ia program-ko ong·atanio PMEGP aro uandakgipa dingtang dingtang scheme-rangni bidingo DCIC-ni General Manager M War, Project Manager Chengreng D Sangma, Project Manager Charming D Sangma aro gipin official-rang, jolni chadamberangna aro dingtang dingtang SHG-ni membor-rangna agan-talate on·angaha.
