TURA: Re·anggipa Sonibar salo, State Bank of India (SBI) Tikrikilla Branch-ni gita Mega Farmers Meet-ko Tikrikilla jolo donggipa Abhirampara songni Pragatipur Deficit UP School-o ong·atangaha aro ia program-ko ong·atanio Laskarpara (Hajong), Dhalapara, Potomati, Batapara, Bordubi, Kharsengdhap aro Kangkorpara songrangni gaonburarang aro bang·bea game ge·e cha·giparang bakko ra·angtokaha.
Ia program-ko SBI Tura Region-ni Regional Manager Dharmananda Banai-ni ku·pattianichi ong·atangaha aro ia program-ko ong·atanio SBI Tikrikilla-ni Branch Manager Bhaskaran Naorem, Assistant Manager Manoj Kumar Choudhary aro gipin bank official-rangba dongpae bak ra·angaha.
Ia program-ko ong·atani SBI Tikrikilla-ni Branch Manager Bhaskaran Naorem, jinmana aganprakengon, India sorkarini ning·o on·enggipa dingtang dingtang scheme-rang, jekai PMSBY, PMJJBY, APY aro uandakgipa scheme-rangni gimin songni nokni manderangna agan-talate on·angenba, bank-ona re·bae ia scheme-ni namgnirangko ra·china gita didiangaha. ATM card-rangko jakkalani giminba ia tom·anio ua, songni manderangna aro mongsongbate game ge·e cha·giparangna agan-talate on·angaha.
Bank-ni kamrangko ka·anio maming neng·nikani gri ka·na man·na gita Bank-ni gitalbatsranggipa app ‘YONO’-ko jakkalani bidingoba SBI Tikrikilla-ni Branch Manager, ia tom·anio jinmana talate on·angaha.
Ma·mong sorkarini ra·gate on·gipa Kisan Credit Card (KCC) loan scheme-ni gimin talataniko on·angengon, game ge·e cha·giparang ia loan-ni tangka paisarangko somoi gita bank-na chotpilgenchimode aro somoi gita renew ka·genchimode ia scheme-ko bilsi bongana dontonggija jakkalna man·gen ine Naorem parakataha.
