TURA: 2005 bilsini September 30 tariko ong·anggipa a·selko gisik ra·na gita bilsiantian Tura-ni Chandmary kal·chakramo jinma tom·bimonge bi·anirangko dakrongengoba, ia changode Tura-o jinma tom·bimonganiko ong·atgija 30th September Victims Solidarity Forum (VSF)-ni dilgiparang, Bristibar salni bako sianggipa manderangni gopramrango aro cenotaph-o mande ra·pilskaanirangko dakangaha.
Tura-o ia salko gisik ra·na gita jinma tom·aniko ong·atjahaoba Williamnagar-ode skango dakrongbaenga gitan jinma tom·e sianggipa janggirangna aro uamangni nokdangrangna jinma bi·chakanirangko dakangskaaha.
Bilsi 15-na skang, MBOSE-ni headquarter-ko a·dok sorkarini Shillong-ona apjitangna jotton ka·aniko manderangni jegaltokengmiting somoio Tura aro Williamnagar biap damgnion, jegalenggipa manderangko Police-rangni skatang goani a·sel Tura-o sak 4 aro Williamnagar-o sak 5 manderang so·otako man·ahachim. Ia a·sel ong·anio gimik sak 9 manderang so·otako man·angan baksana bang·bea manderang guli nangako man·e saknaanirangkoba man·tokahachim.
Ua apsan salon Baghmara-oba chatro chatrirang aro jolni manderang tom·aniko ong·atengachim indiba ua somoio rang·gitik mikkarang jimbee waahani a·sel manderang noktangtangona re·angpiltokna gita nangaiahachim aro uandaken Baghmara-o iandake a·sel ong·aniko chagrongna gita nangjahachim.
2005 bilsini September 30 tariko ong·gipa a·selni bidingo minggni judicial inquiry-ko dakchina gita a·dok sorkari, kamoni neng·takgimin Justice DN Chaudhury-ko songe on·ahaon, Tura-o a·sel ong·anina District Administration aro Police dolko matnange report-ko on·ahachim.
Ua somoio Williamnagar-o a·sel ong·gipani bidingo gitcham Justice DN Baruah judicial inquiry-ko dakskaahachim indiba ua a·sel ong·anina darangkoba jaksi otgija, jingjengatenggipa manderangko namatna man·jae police-rang silchidarerangchi gona nangaha ine report-ko on·skaahachim.
2005 bilsini Sept 30 tariko ong·gipa a·selko GH-ni manderang gisik ra·a
Date:
Share post:
