TURA: Sombar salo South West Garo Hills a·jani District Mental Health Program aro District Legal Services Authority (DLSA) nangrimenba, World Mental Health Day-ko maniani bak gita bike rally-ko Betasing Bazar-o ong·atangaha.
Ia bike rally-ko South West Garo Hills a·jani Additional Deputy Commissioner (ADC) AVD Shira, a·bachengate on·angaha aro ia bike rally-o South West Garo Hills a·jani Am·beng Youth Riders, medical-o kam ka·giparang baksa nangrime bakko ra·angtokaha.
Ia bike rally-ko ong·atanio bakko ra·gipa manderang, an·tangtangni cholao ‘Mental Health Matters’ ba gisikni an·seng baljokaniko mandena nangchongmota ine sea donggipako ganenba, Kalaichar aro Zikzak jolrango donggipa dingtang dingtang biaprangona re·ange, mental health ba gisikni gita an·seng baljokani bidingo manderangna mikrakatanirangko on·angaha.
Ia World Mental Health Day-ko maniani bak gita dingtangmancha free health camp-koba Betasing Farmer’s Market-o ong·atangaha aro ia health camp-ko ong·atanioba SWGH a·jani ADC AVD Shira dongpae jinmana aganprakangengon, chadamberangan duknirangko man·e gisikni gita saanirangko man·rongbatani gimin iandakmiting somoirango chadamberangna namen simsakna nanga ine didianiko on·angaha.
An·tangtangni somoirangko name jakkalchina gita chadamberangko didiangengon, ripeng baseanio simsakgiparang ong·china aro dukni somoirango an·tangtangni ripengskarangna dakchakanirangko on·china gita Shira, chadamberangko didiangaha.
World Mental Health Day-ko maniani bak gita bike rally-ko ong·ata
Date:
Share post:
