TURA: South Garo Hills-ni diltugipa biapo mija re·anggipa Britibar walo trak bolsaoniko rama dilmao dakait dakgiparangni cha·ugipa gimik gong lak 20 hajal 40-mang tangka dongachim unoni laksnimang gimaenga.
East Garo Hills police, south Garo Hills-ni koborko on·atako man·e walni somaio Assam-china katgipa dakait dakgipa dolko changrikaha aro gimik sak dok dakaitrangko rim·aha indiba garioniko lak 13 hajal 20,500-san rim·giparang parakaha aro gong 7,19,500 dong·kuengachim.
A·brini jat aro a·bri jat ong·gija brinbawe dakait dakgipa dol, South Garo Hills-ni songgadam Rongara a·jolo gue nokgiparangna tangka gamna ra·anggipa trak gari October 14 walni 7 bajimango ja·rikangaha. Uamang South Garo Hills-ni Panda reserve forest-o ramako champengaha.
Dambuk, Dilsingre aro Rongara-o game cha·giparangna tangka gamna sakgni gipin manderang baksa gari salgipako nokgipa wataha.
Atte aro pistolrang baksa silchidare jakbitgipa manderang rama champengaha aro tangka ra·seke kataha ine a·selko gari salgipa nokgipana u·iataha uandake nokgipa Baghmara police-na dakait dakani koborko on·chenggipa ong·a.
South aro East Garo Hills district-rangoni police-rang nangrime ramarangko champengaha aro East Garo Hills Rongmill-o dakait dolko changrikaha aro rim·aha. Nokgipani tangka gimikko agana gita melikujaenga, gong 7,19,500 sokujaenga.
Indakmitingo, police-ni sing·rokao gari salgipa dakait dol baksa an·tangni jak dongpaaniko aro apsan miksongako parakaha. Indake gari salgipako custody-ona rimangaha.
Rim·a man·gipa sak dok manderang Assam, Dudhnoi Patpara-oni Chapdul Ali, Assam, Matia Gohaipur-ni Oku Ali, Assam Matia Sidhabari-ni Amir Hussain, North Garo Hills Dainadubi Dobakkol-ni Balsrang K Marak, North Garo Hills Daidubi Mendhipathar Chisim Apal-ni Ewan R Marak aro North Garo Hills Dainadubi Mendipathar Bugakol-ni Sailen G Momin ong·a.
Gari salgipa jean dakait dakani tamasa gimiko dakaha jean rim·a man·aha ua Assam Goalpara Dudhnoi Bohoti Nayapara-ni Hasain Ali minggipa ong·a.