SHILLONG: Meghalaya a·doko gital bobil dolko bikotna gita Naga bobil dol NSCN-IM-ni dakchakaniko ra·ani gimin rim·ako man·gipa Joannes Lamare aro gipin sakgittam manderang, re·baenggipa salrango, jaminna dorgastoko galnaba gnang.
Kobor on·timgiparangni u·iatani gitade, sal 14-na judicial custody-o donatako man·gipa mande sakbriko, a·doko bobil dake chakatgipa dolko bikotna jotton ka·ahani gimin Unlawful Activities (Prevention) Act 1967-ni ning·o mokordoma ka·ahachim.
Songsalna kamko ka·gipa Joannes Lamare baksa rim·ako man·gipa gipin sakgittam manderangara, Saitsohpen Sohra-oni bilsi 30 ong·gipa Vicky Mawnai, West Khasi Hills a·jani Shallang Rengmaw-oni bilsi 34 ong·gipa Everpearl Mawsor aro Sohra Wahkaliar-oni Aloysius Syiemlieh ong·achim.
Ia manderangni kosako Mawlai Police, IPC Section 120B/121/121A/34-ni ning·o mokordoma ka·ahachim.
Ia manderangko, re·anggipa September jani 17 tariko Nagaland a·dokni Dimapur Hebron-o donggipa NSCN (IM) camp-oni re·pilbaengmiting somoio police-rang rim·soahachim.
Meghalaya a·doko gital bobil dolko bikotna gita ia manderang NSCN (IM)-ni dakchakaniko ra·na gitasa Dimapur-ona re·angaha ine police-rang a·kangahachim.