TURA: Re·baenggipa October-ni 30 tariko ong·atenggipa Rajabala Assembly Constituency-ni by-election-na da·o somoirang sepangbaroroengahaon, National People’s Party (NPP) aro
Congress dolgnian, an·tangtangna vote-rangko salna gita kam ka·anirangko bilakbatataha aro uandaken Sombar salo ia dolgnian Rajabala constituency-ni ning·o donggipa A·chik songrangko wenangaha.
Rajabala by-election-na NPP-ni national president aro Meghalaya a·dokni Chief Minister Conrad K Sangma an·tangan Sombar salo, Rajabala constituency-ona re·angpile, NPP-ni candidate Abdus Saleh aro gipin dilgiparang baksa Chokchokia aro Bhaitbari songrangona re·ange campaign-ko ka·angaha.
Ia by-election-na campaign ka·ani bon·kamgipa tarikara October 27 tarik ong·engani gimin ua an·tangan Rajabala constituency-o dongkame campaign-ko ka·anggen ineba NPP-ni national president parakataha.
NPP-ni candidate Abdus Saleh-ni bidingo A·chik songrango donggipa manderangna talataniko on·angengon, ua saksa A·chik ong·jagenchimoba chengonin Garo Hills-o songdongkamgipa ong·e A·chik jatni daka rikaniko name ma·sigipa ong·a aro ia by-election-o seokako man·genchimode ua darang jatkoba maming mikkang niteani grian Rajabala constituency-o songdongenggipa manderangna dangdike on·gen ine NPP-ni candidate-na pu·onchina gita manderangko Sangma didiangaha.
Congress dolni kosako matnange aganangengon, Congress dolo da·o dilgiparang dongjahani gimin mikkangchi Congress dolna maming ka·dongani dongjaha ine Congress dolni campaign ka·anirango ku·rachakanirangko bebera·jachina gita Sangma didiangaha.
Meghalaya a·dokni constituency damgittamo by-election-ko ong·atengani gimin ia biap damgittamon NPP chegipa ong·gen ineba a·dokni Chief Minister aro NPP-ni national president, an·tangni ka·dongsoenganiko parakangaha.
Ia apsan salon, Congress Legislature Party (CLP)-ni dilgipa Mukul Sangma baksana Congress dolni dingtang dingtang dilgiparang Congress-ni candidate Hashina Yasmin Mondal-na, Rajabala constituency-ni ning·o donggipa Gimegre songo campaign ka·angskaaha.
Ia songo a·dokni gitcham chief minister aro Congress dolni dilgipa Mukul Sangma, Congress dolni candidate Hashina Yasmin Mondal-ko seokchina Gimegre songni manderangko didiangengon, Meghalaya a·dokni bang·bata constituency-rangon dingtang dingtang jatrang meli nangrime janggi tangenga ine jat baseani gri dilgipako seokchina didiangaha.
NPP-chi dilenggipa MDA sorkarini kamrangni gimin janapatengon, Bangladesh aro samba jolo donggipa dingtang dingtang a·songrang baksa bading chiwale cha·ani cholko tarina gita 2012 bilsio Congress sorkarini man·bae on·gipa rama project-rangko ia sorkari bon·chipatenga ine Sangma matnangataha.
Meghalaya Technical University-ko Captain Williamson Technical University ine Assembly-o bill pass ka·enba building-ko rikna sanction ka·ani ja·manoba maini gimin ia sorkari da·onan ia university-ko a·bachengatna man·kujaenga ineba ia tom·anio CLP-ni dilgipa sing·doangaha. Apsan daken Tura Medical College-ko matchotatninggija donengani giminba ua MDA sorkarini kamko sing·doangaha.