SHILLONG: Adita salrangna skang matchotanggipa Meghalaya by-election damgittamo chegipa gital MLA-rang, chong·motan Rajabala constituency-ni gital MLA Md Abdus Saleh, Mawryngkneng constituency-ni gital MLA Pyniaid Sing Syiem aro Mawphlang constituency-ni gital MLA Eugeneson Lyngdoh, mijal Sukrobar salo Meghalaya Legislative Assembly-o ku·mikchetaniko dakangaha.
Meghalaya Assembly-o ku·mikchetaniko dakangani ja·man Rajabala constituency-ni gital MLA Abdus Saleh, kobor ra·timgiparang baksa agangrikengon, NPP-chi dilenggipa MDA sorkarini kamrango kusi ong·engani giminsa Rajabala constituency-ni manderang uko aro NPP-ko seokaha maina batanggimin changrango NPP dol, ia constituency-o changsaba chea dongkujachim ine parakataha. Sorkari baksa bakrime an·tangni constituency-ni manderangna nambate dangdike on·angna gitaba ua ku·rachakaniko on·angaha.
Mawryngkneng constituency-ni gital MLA Pyniaid Sing Syiem-ba ku·mikchetaniko dakani ja·man kobor ra·timgiparang baksa agangrikengon, ua an·tangni constituency-nasan ong·aigija a·dok gimiknan kamko ka·gen ine ku·rachakaniko on·angaha.
Bilsisa atani gisepo kamrangko matchotataniara una rakbegipa kam ong·naba gnang ine janapatengon, ua MDA sorkari baksa nangrime kamrangko chu·sokatna on·kange kamko ka·gen ine Syiem parakataha.
Mawphlang-ni gital MLA Eugeneson Lyngdoh-ba ku·mikchetaniko dakani ja·man kobor ra·timgiparang baksa agangrikengon, uni pagipa SK Sunn sagini matchotanggijagipa kamrangko matchotate on·na ku·rachakangskaaha.
Ia sakgittam MLA-rangni ku·mikchetanio dongpae bakko ra·anggipa manderangara NPP aro UDP-ni MLA-rang, dolgnini gipin dilgiparang aro Congress dolni MLA HM Shangpliang ong·achim.