TURA: Raksamgre constituency-o Eklavya Model Residential School (EMRS)-ko rikna gita 2019 bilsion pangchakaniko songe on·ahaoba da·onan kamrangko a·bachengkujaenga ine Garoland State Movement Committee (GSMC) Pedaldoba regional unit matnangataha.
GSMC Pedaldoba regional unit-ni chairman Rimjen Ch Sangma-ni u·iatani gitade, Meghalaya a·dok gimikna on·gipa dam 11 Eklavya skulrangoni damsakode Raksamgre constituency ning·o rikna on·ahani gimin Salbaripara Land Reservation Committee-an ia skulna maming tangka paisa gri acre 12.4 ong·gipa a·ako on·aha aro uandaken ia skulko Salbaripara songo rikna gita 2019 bilsini March 6 tarikon Raksamgre constituency-ni MLA Benedic R Marak, West Garo Hills a·jani Deputy Commissioner Ram Singh-ni mikkangon pangchakaniko songe on·angahachim.
Indake ong·engon, ia skulna pangchakaniko songe on·angaoni da·o bilsigni batangpilahaoba ia skul nokko rikna gita da·onan kamrangko a·bachengkujaenga ine GSMC Pedaldoba unit-ni chairman parakataha.
Iani bidingo ta·raken kamrangko niatchina gitaba ua Union Tribal Affairs Ministry aro Meghalaya a·dokni Chief Minister-ko didiataha.