SHILLONG: Meghalaya a·doko songdongenggipa Tribal-rangko chel·chakna gita rakgipa niamrangko ra·gate on·jaskalde Meghalaya a·doko aro mongsongbate Ri Bhoi, Khasi Hills a·jarango rel ramarangko tarina man·kujawa ine Mongolbar salo Ri Bhoi a·jani dolbri NGO-rang, chong·motan KSU, RBYF, HNYF aro FKJGP dolrang parakataha.
Ri Bhoi a·jao rel ramarangko tariani bidingo chanchirimna gita re·anggipa Mongolbar salo Ri Bhoi a·jani Deputy Commissioner, North East Frontier Railway (NFR)-ni official-rang aro NGO-rangko okame tom·aniko ong·atangahachim indiba ia dolbri NGO-rang, rel rama tarianiko jegalna gita ia tom·aoni ong·kate kataha.
Ia tom·aoni ong·kate katani ja·man KSU NKHD-ni president Ferdynald Kharkamni, kobor ra·timgiparangna talataniko on·angengon, 1980 bilsirangonin KSU, rel rama tarianiko jegalenga aro ILP-ko ra·gate on·jaskalde Ri Bhoi a·jao rel ramarangko tarina man·kujawa ine parakataha.
“A·doko Inner Line Permit aro Meghalaya Residents Safety & Security Act (MRSSA)-ko ra·gate on·jaskalde a·doko rel rama tarianiko sorkari jumang nikjachina. A·doko ia niamrangko ra·gatgenchimoba a·jani dilgiparangde iani bidingo mamingkoba dakna bil dongja maina ian a·doko songdongenggipa Tribal jatrangni nangnikanisa ong·engani gimin ma·mongni dilgiparangsa nanga gita ja·kurangko de·china,” ine Kharkamni aganaha.
Tetelia-Byrnihat railway line-ko 2017 bilsioba KSU jegalahachim aro ua somoio KSU-ni sak 40 membor-rangko rim·e pattoko donahachim ineba KSU-ni president, gisik ra·atpilaniko on·angaha.
“A·dokona niam gri napsrukaniko champengna gita sorkari rakgipa niamrangko ra·gatkujaskalde chinga rel ramako ra·chakna man·chongmotjawa ine chinga sorkarina namen talataniko on·na nangnikenga. Chinga ia biapo rel rama tarianiko HNYF, RBYF aro FKJGP dolrang baksa raken jegalangkugen,” ine Kharkamni aganaha.
Indake ong·engon, ia tom·anio gipin NGO-rang, chong·motan Hynniewtrep Youth Council (HYC), Hynniewtrep Achik National Movement (HANM), Confederation of Ri Bhoi People (CRBP) aro Garo Students Union (GSU) dolrangba bakko ra·angaha aro ia dolrangba, rel rama tarianiko raken jegaltokaha ine kobor on·aha.