TURA: Ma·mong sorkarini ra·gate on·gipa scheme-rangko Meghalaya sorkari name chu·sokatjaenga ine Tura-ni BJP MDC Bernard N Marak matnangatenba, ma·mongni ra·gate on·gipa scheme-rangko nirokna gita a·doko vigilance dolko nangenga ine parakataha.
A·songni Prime Minister Narendra Modi-ni ra·gate on·gipa scheme-rang a·dokni manderangona sokjaenga ine matnangatengon, ma·mong sorkarini ra·gatgipa scheme-rangko a·dok sorkari, manderangona sokatani pal doltangtangni manderangnasa on·skaenga ine Marak matnangataha.
“Meghalaya a·doko ma·mong sorkarini scheme-rangko nirokna gita vigilance team-ko nangenga maina ia scheme-rangko a·dok sorkari, manderangna sokatani pal an·tangtangni manderangnasa on·e doltangtangni scheme dake jakkalenga,” ine Tura-ni MDC parakataha.
Marak-ni parakatani gitade, ma·mong sorkarini ra·gatgipa scheme-rangko chu·sokate on·ani bidingo Garo Hills-o donggipa dingtang dingtang block-rangba mesoke on·na jechaktokenga.
“Ma·mongo BJP-chi dilenggipa sorkari, pilak gadangni manderangnan dingtang dingtang scheme-rangko sokate on·na gita ja·kurangko de·engachim indiba ia scheme-rangko jako ra·e ka·enggipa department-rang, ia scheme-rangko chu·sokate on·ani bidingo mesokna jechakenga. Ia scheme-rangko chu·sokatani bidingo ma·sie ra·na gita ia bilsini February aro July jaoba RTI-ko ka·ahachim indiba da·onan talatanirangko on·kujaenga,” ine Marak parakataha.
A·dok sorkari manderangko cha·bokna nangja ine mikrakataniko on·angengon, Garo Hills-ni pilak biaprangon ia scheme-rangko chu·sokate on·jaengani gimin BJP-ni dilgiparang, manderangni badi ka·anirangko man·enga ine Tura-ni MDC parakataha.