TURA: December-ni 6 aro 7 tarikrango Don Bosco Past Pupils Association, Tura Unit-ni gita pekatgipa bosturang, jekai sam, chu aro uandakgipa bosturangko jakkalanichi maidakgipa nangchakeaniko mandena ra·bana man·achim, uarangni bidingo chatro chatrirangna agan-talate on·na gita awareness program-ko salgnina, Tura-ni Don Bosco College Higher Secondary Section-o ong·atangaha.
Ia awareness program-ko association-ni secretary Roger Benny A Sangma-ni dilanichi ong·atangaha aro ia program-ko ong·atanio Health & Family Welfare department-ni ning·o donggipa DEIC-ni Psychologist aro Counsellor Nomitha K Sangma, Advocate Twinkle D Sangma, association-ni vice president Dipu N Marak, association-ni adviser David Ch Marak aro association-ni president Hilarius Ch Sangma, gimik sak 700 chatro chatrirangna dingtang dingtang katta bichongrango pangchake agan-talate on·angaha.
Ia program-ko a·bachengatanio Don Bosco College Higher Secondary Section-ni Principal Fr Jogesh B Sangma, rimchaksoani kattarangko aganangengon, pekatgipa bosturangoni chel·e dongchina gita chatro chatrirangko didiangaha.
