SHILLONG: Meghalaya a·doko Jal Jeevan Mission (JJM)-ko ta·raken matchotatna man·na gita Jal Shakti-ni Union Ministry, gong kror 169.60 tangkarangko Meghalaya a·dokna chame on·ataha.
Ia tangka paisarangko chame on·atani bidingo u·iatengon, a·songni pilak songadam nokadamrango donggipa nokantionan chi pipe-rangko sale on·na gita ma·mong sorkari nangnikenga ine Jal Shakti Ministry parakataha.
“Meghalaya a·doko Jal Jeevan Mission-ko ta·raken chu·sokatchina gita India sorkari, gong kror 169.60 tangkarangko chame on·ataha,” ine Ministry-ni u·iatanio parakataha.
2021-22 bilsini gisepo Jal Jeevan Mission-ni kamrangna ma·mong sorkari, gong kror 678.39 tangkarangko a·dokna chamataha aro ian 2020-21 bilsio chamatgipa tangka paisarang baksa tosusagenchimode changbrimang batpilengachim.
Meghalaya a·dokni songadam nokadamrango te lak 5.90 nokdangrang gnang aro Jal Jeevan Mission-ni ning·o chi pipe-rangko sale on·ani da·o 31.94 percent-de matchotahani gimin te lak 1.88 nokdangrangde chi pipe-rangko man·tokaha.
Ia bilsini gisepon Meghalaya sorkari, te lak 3.39 nokdangrangna chi pipe-rangko sale on·na nisanko donengachim ine nikna man·a.