Sima-ariko tik ka·grikani bidingo songsal-political dilgiparang baksa chanchirimchenggen

SHILLONG: Assam aro Meghalaya sima arini golmalrangko tik ka·grikna gita dolgittam regional party-rangko Assam aro Megha-laya dolgni nangrime paltangtang gita songaha indake uamangni report-rangko pakwatani ja·mano, report-rangko nigrikaniko dakenba, Assam sorkari baksa bon·kame tik ka·grikaniko dakna skang, a·dok sorkari, daito ra·gipa dilgiparang aroba political party-rangni representatiive-rang baksa chanchirimaniko dak-chenggen ine Meghalaya Chief Minister Conrad Sangma mijalo aganaha.
Chief Minister indakeba aganaha je, a·dok damgnini sima ario donggipa kajia golmal gnanggipa damdok biaprangko man·a dipet seng·gnange sima tik ka·na gita sorkari jotton ka·enga. Kam ka·anio chu·soknagipa chinrangko niksamsoenga indiba ian report-rango pangchakgen, iarangni bidingo bang·gija antirangni gisepon chanchirimaniko dakanggen, CM aganaha. Unomitingo Home Minister, Lahkmen Rymbui-ba indake aganaha je Assam aro Meghalaya a·dok damgnian sima-arini neng·nikanirangko namatna gita mikpakma nitokenga. Indake ong·engon, report-rangko sorkarina pakwatna skangba East Jaintia Hills aro Cachar district-ni team-rang bon·kame tom·e chanchichenggen, uni ja·mano December 15 ba una skang report-rangko sorkarina pakwatgen ineba Rymbui aganaha.