NEW DELHI: Meghalaya a·dokni North Eastern Hill University (NEHU)-ko man·chape central university-rango gapatna nangenggipa kamrangni gimin Sombar salo, Tura-ni MP Agatha K Sangma, Parliament-ni session-o janapangenba, a·dokni pilak university aro college-rangko ra·dochina gita dabiangaha.
Parliament Session-ni Zero Hour-o iako janapangengon, NEHU Tura Campus-o Science, Life Science aro Physical Science gita dakgipa department-rangkoba kulichina gita Tura-ni MP dabiangenba, ia campus-o chatro chatrirangna chu·onga gita biaprangko on·china aro assistant professor-rangko rakkidapchina gitaba didiangaha.
NEHU Tura campus-o Kendriya Vidyalaya-ko kulichina, Agriculture department-na dingtang dingtang cholrangko on·dapchina aro Tura campus-o konta 24 kam ka·gipa medical unit-ko songchina gitaba Sangma dabiangaha.
Agatha-ni dabianirangna aro sing·anirangna Education-ni Union Minister of State Annapurna Devi, aganchakaniko on·angengon, a·song gimikon aro mongsongbate salgro salaram a·dokrango donggipa central university aro gipin skie on·chakgipa biaprango ma·mong sorkari ta·raken skigiparangko gapatengaha aro Information & Communication Technology-na tangka paisarangko chamataha ine parakataha. University-rango skigiparangko gapatna nangengani gimin aganchakaniko on·angengon, iarangko University Grants Commission (UGC), university-rang baksa agangrike nirok sandianirangko dakronga indiba kamrangko gapatanide Parliament-ni niamrango pangchake central university-rangni daitosa ong·a ine Annapurna Devi parakataha.
Indake ong·engon, skulrango skigiparang chu·ongjaengani giminba Parliament-ni Session-o janapangengon, skigiparangni chu·onggijaniko gapatna gita sorkari ja·kurangko de·engama ine Tura-ni MP sing·doangaha.