SHILLONG: Krismasko maniengon, dingtang dingtang jakni kamrangko changgipa sapgiparangna aro dingtang dingtang changa sapanirang donggipa manderangna cholrangko on·na gita mijal Bristibar salo salsana Winter Tales Festival-ko Shillong songjinmani Ward’s Lake-o ong·atangaha.
Ia Winter Tales Festival-ko a·dokni Chief Minister Conrad K Sangma, do·ga oe on·angaha aro ia festival ba manianiko a·bachengatanio dingtang dingtang official-rangba dongpae bak ra·angaha.
Ia festival-ko do·ga oe on·angani ja·man kobor ra·timgipa manderang baksa agangrikengon, ia festival ba manianiara joltango ma·manti changa sapani donggipa manderangko aro uamangni bosturangko ra·dona miksonge ong·atenggipa festival ong·a aro ia festival-o joltangonisan ong·aigija a·gilsakni gipin biaprangoniba re·bae bakko ra·enga ine Chief Minister parakataha.
Ia Winter Tales Festival-ko bilsiantian ong·atgenma ine sing·on, ia festival-ko bilsiantian ong·atna miksonganirang donga aro mikkang bilsionide ia festival-ko dal·bate ong·atna miksongenga ine Chief Minister parakataha.
Ia festival-ko do·ga oe on·angani somoio Chief Minister, Meghalaya a·doko songdongenggipa manderangna an·tangni Krismasna namgipa skaniko parakatjolaha.