Philip Marwein
Meghalaya North Garo Hills-ni constituency-rangni gisepo namroro-silroroanina chol gnangbatgiparangoni 37-Kharkutta constituency-ba damsa ong·a, jean ge·e game cha·anio, bari-bagan dake cha·ani aro ua gita gipin gipin kamrango aro tourism-naba bang·en cholrang donga, je constituency-an, Assam Goalpara district aro West Khasi Hills district baksa sima arigrika aro Garo Hills-na mongsonggipa do·gachol gitaba ong·a. Iano pilakchinan re·na dona altugipa rama sorokrang donga, mongsonggipa highway-rang jedake Assamni Boko-oni Paikan- Krishnai, NH 62 Dudnoi- Rongjeng-Nengkhra-Nangalbibra-
Constituency-o, ge·e game aro bari bagan dake cha·na gita bang·en cholrang dongengon, ia constituencgy-ni ning·o te·rik, gue, rubber, e·ching, gulmoris, anaros, sal·a, te·brong, te·gatchu, ta·bolchu, ta·a indongarangko bang·en man·a, iarangna agreba komila, komperam, letchu, jal·ik, jingga, ka·rek, akkaru-gominda, me·su-samjakrang, minil, jaha-ko man·chape dingtang rokomni mi-misirangko bang·en man·a. Unbaksana, Chilpara songo te·rik chips, te·rikni chu dakgipa food processing unit-rang bang·en donga iarangna agreba Mendima songo uandakgipa gipin gipin songrangoba tarie palgiparang bang·en donga indiba bang·a songrangonan wenangna man·jaha.
Unbaksana joltangni MLA Rupert Momin-ni didiatako man·e cooperative society-rangkoba kulidapaha. Uarangoni Nangrime Integrated Village Cooperative Society Ltd, Gairong, jekon Haru Momin President aro Billingston Marak Secretary ong·e chalaidilenga aro uamang skanggipa Pseudo- Banana Stem manufacturing Unit-ko, National Highway 62 sambajolo Gairong bajar sepango kuliaha. Cooperative Society-ni miksonggiminrangko bimang ong·atna gita A·We Banana Pseudo-Stem Co-operative Society Ltd, Gairong, North Garo Hills-ko President Arthaban Sangma aro Demure T. Sangma, Secretary aro Gairong aro uagita gipin songrangni manderangko membor seoka, kuliaha. Society-ni iako kuliani miksonganira, fibre, galgimin lekka, soda ugita gipin bosturangko tarina aro jila alanirangna cha·anirangko tarina gita kuliaha. Uamangni miksonganirang be·en pil·ode constituency-ni gipin biaprangoba indakgipa unit-rangko kuligen ine Secretary, Demure aganaha.
Bija jile cha·na gitaba iano namen chol donga, indake NAFED gita dakgipa a·palchini agency-rang Kharkutta aro North Garo Hills-ni game cha·giparang baksa bija jile cha·ani bidingo bakrime kamrangko ka·na gita gisiko nangbaenga aro Framers Produces’ Organisations (FPOs)-ko songna gitaba chanchienga jean cluster-o pangchakgipa organisation-rang ong·gen. Agency-rangoni dolsade A.T road,Guwahati-o donggipa Salt Range Foundation-an ong·enga. Ia Foundation (Agency), FPO-rangko kuligen aro uamangko registration of companies Act-o pangchake biming segatgen uni ja·mano FPO-rangni memborrangna gadang gadang dake skie on·gen aro bija jile cha·anio an·tangon ga·chatna man·na gita uamangna bilsi gittamna kingking dakchakaniko on·gen.
Meghalaya Sorkari, Agriculture, Horticulture, Forest, PWD, PHE dakgiparang bang·en dakchakanirangko on·gen indakoba Water Resources, Health, Education, Fishery, Tourism, Sericulture, Industry aro ugitarangode tang·doaniko nikna neng·enga, je dakgipa kamrangon manderang ku·si ong·tokjaenga. Indake ong·genchimoba joltangni MLA Rupert Momin-ni rake kam ka·anichi aroba ja·ku de·dilanichi chonchongipa cha·ani tarini unit-rang, agriculture, horticulture dakgiparangode tang·doangna man·engaha.
North Garo Hills-ko mongsongbate Kharkutta constituency-o tangka paisarangko man·anina, Tourism-ba mingsa mongsonggipa ong·a. North Garo Hills, a·gilsakni ong·telaigiparango aro nitoanio pattiako man·gipa ong·a. Tangsekgipa buring bolgrimrang komigenchimoba, uarangko te·rik, gue aro rubber baganrangchi gipatskaaha. Iana agre sal·a baganrangchiba biaprangko tangseke rakkia. Manda, Chil, Rongchong aro Ildek indakgipa grikgipa chibimarangba North Garo Hills-o donga, jeonikon a·jolo donggiparangna na·tok-na·batrangko am·e cha·na dakchaka. Idake mingsinggipa Simsangsang chibimao man·gipa Na·nil, Na·dang, Na·chi, Na·bat, Na·rong, Na·ek dakgiparangko ia chibimarangoba man·a. Ildek, Manda, Chil, Rongchong dakgipa chibima rikamrang, Na·ka Chikong dare, Mokma dare, Rong·ma Gitil gita dakgipa namnamgipa tourist picnic spot-rangba bang·en donga. Paragliding sports-ko namnikgiparangnaba biaprang donga.
Indakeba nikatna man·a je Kharkutta ian Meghalayani 37-gipa constituency ong·a. Iano sak 45,000 mang voter-rang donga jeon mongsongbate tribal (Garo)-rang songdong-a·chaa aro uamangni tangka paisa kamaianide uan songni nokni kamrangchin ong·a. Ro·ong, an·chengna agrede, gipin a·ningni gamrangde iano dongja gitan ong·aia, indake ong·genchimoba bolsal, Segun aro nokrik nokdakna aro ringrangko tarina namgipa gipin gamchatgipa bolrang, indakgipa gamchatgipa buring bolgrimrangni gamrang donga.