Piggery aro Milk Mission-ni ning·o dol 39 cooperative society-rangna cheque-rangko sualanga

TURA: A·dok sorkarini a·bachengate on·gipa Piggery aro Milk Mission-ko mijal Sombar salo, Garo Hills-oba a·dokni Chief Minister Conrad Sangma, a·bachengate on·angaha aro ia mission-rangko a·bachengate on·anganio ua dol 39 cooperative society-rangna cheque-rangko suale on·angjolaha.
Piggery Mission-ni ning·o dol 26 cooperative society-rangna gimik gong kror 6.24-ni cheque-rangko aro Milk Mission-ni ning·o dol 13 cooperative society-rangna gimik gong kror 2.17-ni cheque-rangko suale on·angaha.
Garo Hills-ni cooperative society-rangna ia mission-ni cheque-rangko suale on·angani somoio a·dokni Chief Minister, jinmana aganprakangengon, ia sal somoirango chadamberangna sorkarini kamrangko tikate on·na man·jaengahani gimin jilla kaani kamrangko tang·doate chadamberangna janggi tangani cholrangko on·skana nikjumanganirang dongani gimin sorkari, ia mission-rangko ra·gate on·aha ine parakataha.
Meghalaya a·doko wak jilani, dudni bosturangko tariani, do·o jilani aro do·bok jilani kamrangko tang·doatna gita sorkari, Agriculture aro uandakgipa department-rangni ning·o gong kror 600-mangko koros ka·enga ineba ia tom·anio Chief Minister parakataha.
Chief Minister-ni parakatani gitade, ia gong kror 209 ong·gipa Piggery project-ara India a·songo dal·batsranggipa piggery program ong·ani gimin game ge·e cha·giparangna wakrangko jile cha·na cholrangko on·na dakchakgen.
Ia Piggery aro Milk Mission-ko Garo Hills-na a·bachengate on·angani somoio dongpae bakko ra·anggipa gipin manderangara, Animal Husbandry & Veterinary aro Cooperative Department-ni Principal Secretary GHP Raju, West Garo Hills a·jani Deputy Commissioner Ram Singh aro gipinrang ong·a.