TURA: Adita salrangna skang VEC election-ko ong·atanio Zikzak-ni MDC Aktar Ali, an·tangni mandena chake election-ni niamrangko pe·aha ine South West Garo Hills a·jani Mahendraganj ning·o donggipa Kukurmua songni manderang badi ka·doangaha.
Iani bidingo South West Garo Hills a·jani Deputy Commissioner Ch Ramakrishna-na badi ka·e sedoatengon, re·anggipa bilsini December 21 tariko Kukurmua village employment council (VEC)-ni president aro secretary seokna gita election-ko ong·atanio Zikzak-ni MDC, dongimin niamrangko pe·e an·tangni skani gitasa ong·ataha ine songni manderang matnangataha.
Deputy Commissioner-na badi ka·doangani gitade, ia VEC election-ko Kukurmua songosa ong·atani ong·achim indiba MDC-ni ge·etanichi ia election-ko uni nok sambao donggipa inspection bungalow (IB)-osa ong·atskaahachim.
Election-ni somoio gipin songni manderangde dongpaani ong·jagenchimoba MDC aro uni depantegipa baksana gipin songni manderangba, election ong·atgipa kuturio nape manderangko salna jotton ka·aha ineba songni manderang matnangataha.
MDC-ni chakgipa mandena mande saksaan, changni chang pu·onaha ineba Kukurmua songni manderang badi ka·doangaha.
Ia VEC election-ko ong·ataniara niam gita ong·jaha ine janapatengon, ia gital VEC-ko ra·chakna on·jachina gita South West Garo Hills a·jani Deputy Commissioner-ko Kukurmua songni manderang, BDO-na ge·etaniko on·china gita didiataha.