SHILLONG: South Garo Hills a·jao niam gri koela badinganiko champengchina gita Garo Hills-ni A·chik Holistic Awakening Movement (AHAM) aro Constutional Rights Forum (CRF) dolrangni ku·rangko on·angani ja·man, South Garo Hills a·jao koela badingna on·aniara National Green Tribunal (NGT)-ni niamrangko pe·ani ong·chongmotenga ine RTI activist Agnes Kharshiing-ba parakataha.
“Garo Hills-ni NGO-rang baksa angaba iako ku·rang on·paenga. A·dokni Chief Secretary, sorkarini nirokgipa ong·e ta·raken maikobade dakna nangchongmota,” ine Civil Society Women’s Organisation (CSWO)-ni president Kharshiing parakataha.
Kharshiing-ni aganani gitade, Meghalaya a·doko coke aro cement karkanarangni niam gri koelarangko bikotna ari ro·ongrangko bikotna on·aniara Supreme Court aro NGT-ni dongimin niamrangko pe·ani gita ong·enga.
“A·doko bikotgimin ton lak 32-na batpilgipa koelarangni gimin a·dok sorkari, indita bilsirangna Supreme Court-ko tol·aha. Ian a·doko niam gri koelarangko salna mesokanisan ong·aiachim,” ine Kharshiing aganaha.
Bangladesh a·songona salangenggipa koelarangara, gipin biaprangoniko ra·baenggipa koelarang ong·ja indiba South Garo Hills a·jaoniko cho·e salangenggipa koelarangan ong·a ine adita salrangna skangsan South Garo Hills a·jani CRF dol parakatenba, a·doko niam gri koela badingna on·aniko dontongatpilchina a·dokni Chief Secretary-ko didiatahachim.
“Ia company-rang koelarangko Assam-oniko ra·baenga ong·ja indiba South Garo Hills a·jao bikotenggiparangkon salangenga. Ia koelarangara niam gri bikotenggiparangsa ong·a aro ia koelarangko Rongding Awe, Dangsa Awe, Rongsa Awe, Garegittim aro Are Gittim-rangonikon salangenga,” ine CRF-ni president Francis Marak parakatahachim.