TURA: West Garo Hills a·jaoba COVID-19 man·giparang batrorobataiengahani gimin sorkarini ge·etgimin gita mask gangija skatang re·ruraenggipa manderangna aro dokkan dakenggiparangna West Garo Hills a·jani district administration, niamrangko donataha.
Deputy Commissioner-ni u·iataniko on·angani gitade, bazar antidamrango mask gangija re·ruraenggipa manderang, sordi, gusu, fever aro uandakgipa saani chinrang donggenchimode bazar antirango donggipa COVID-19 testing centre-o porikka ra·e nina nanggen.
Bazar antidamrango mask gangija re·ruraenggipa manderangko executive magistrate-rang nikgenchimode ua biapo donggipa testing centre-rango porikkako ra·e nina nanggen.
College-rango poraienggipa chatro chatrirangkoba mask gangijako rim·a man·genchimode ‘Bazar antidamrango mask-ko ganna nangchongmotani’ katta bichongo pangchake, ming 2000 kattarangchi ‘Essay’-ko sena nanggen aro essay-ko sena man·jagenchimode uamangni ma·a paarang, gong 1000/- daiko market committee-na gamna nanggen.
Bazar antirango dokkan dakenggipa aro ma·manti bosturangko palbadinge cha·enggipa manderangba mask-rangko ganjagenchimode aro gipin niamrangko ja·rikjagenchimode COVID-19 testing centre-rango porikka ra·e nina nanggen aro dokkanrango dongtimgiparangba, dairangko gamna nangjana gita ‘Mask-rangko ganna nangchongmotani’ katta bichongo essay-ko seskana nanggen.
Dokkanrango dongtimgiparang mask-rangko ganjagenchimode bostu brena re·baenggipa manderangna dangdike on·na man·jawa aro dokkanoniko bostu brena re·baenggipa manderangnaba, chol ong·gijagiparangnade dokkano donggipa manderangan mask-rangko on·na nanggen.