SHILLONG: A·doko covid sagiparang batrikrikengoba sorkari, lockdown-ko ra·gatana chanchia dongkuja.
“A·doko sorkari, lockdown-ko ra·gatgen ingipa kattaa dongja, ine Health and Family Welfare department-ni Principal Sampath Kumar, Robibar salo agantalataniko on·aha.
Uandake covid sagiparang batrikrikengani gimin janapatengon, “Shillong Civil Hospital-ni ICU-o saksamangba admit ka·gipa dongja. Manderang beben sabisiko man·enga indiba ramram samko jakkale nampiltokaia. Indiba be·eno gipin sabisi dongchapgiparang simsakbatna nanga. Mongsongbate sabisiko man·a altugipa, budepa-buchuma aro be·eno dingtang sabisi dongchapgiparangko sabisi man·aoniko champengna nanga. An·tangtang aro joltangni gita simsak-naljokani bewalrangko ja·rikna nanggen, ine Principal Secretary aganaha.
Iarangni gisepon Principal Sampath, manderangko covidni tikako su·e ra·china mol·molataha.
Minggipin omicron ta·rake gipna altugipa rokom ong·a, uni gimin manderang simsak-naljokani bewalko ja·rikna nanggen aro covid-ni niamrangko ja·rikna nanggen. Delta rokom sokani somoio a·doko salantion sak 300 baten covid saa man·dapaniko nikna man·aha, aro ia changoba omicron rokomba batrikrikna ta·raka, uni gimin sagiparang batrikrikgen, ineba Kumar aganaha.
“Re·baenggipa antignio covid sagiparang batangkugen, indiba ka·sinsin obostarang namangna ka·donga ine Principal Secretary aganaha.
Indake ong·engon da·ororode bang·bata manderangan covid tika su·na re·batokenga, ian namgipa ong·a. Una agreba manderang an·tangtangko porikka ra·e nienba simsak-naljokani bewalrangko ja·rikenga. Chingaba sagiparangni sample-ko genome sequence-na watatenga, indiba sak 300 ni sample-ko genome sequence ka·na bilongen neng·nika, uni gimin salantion bang·gija sample-osan kam ka·enga. Covid saa man·giparangoni 95-oni 98 percent case-de omicron sabisi ong·a, ineba Kumar parakataha.
