TURA: Sombar salo, West Garo Hills a·jani police-rang, rong 210 pekatgipa YABA tablet-rang baksa mande saksako Dalu Police Station-ni Purakhasia Outpost ning·o donggipa song damsaoniko rim·aha.
Police-rangni u·iatani gitade, pekatgipa samrangko badingsrukenga ine koborko man·soani ja·man ua jolo donggipa police-rangna u·iataha aro uandaken ja·mano, BSF sipairangni dakchakanichi a·jani police-rang, mande saksako rim·e uoniko ia samrangko man·aha.
Iani bidingo mokordomako ka·e am·sandianirangko dakna a·bachengengaha ine janapatengon, ia mandeara ‘drugs’ badingenggipa dolni mande ong·ama ong·ja name ma·sikujaenga indiba batanggimin somoirango bang·en ia jolrango sam badinggiparangko rim·na man·aha ine West Garo Hills a·jani Deputy Commissioner Vivekanand Singh parakataha.
Rim·ako man·gipa mandeara Assam a·dokni South Salmara jolo donggipa Dakirgao songni Sohidul Islam ong·achim ineba SP parakataha.