SHILLONG: Shillong songjinmani Mawdiangdiang-o rikenggipa Meghalaya Legislative Assembly-ni gital nokko June jani bon·angachibara matchotgnok ine Assembly-ni Speaker Metbah Lyngdoh parakataha.
Iani bidingo kobor ra·timgiparangna talataniko on·angengon, ua re·anggipa antion ia gital Assembly nokko rikani bidingo official-rang baksa nipilangaha aro June jani bon·angachibarade nok chu·gimikkon matchotgnok ine Assembly-ni Speaker parakataha.
“July jagimikde ia gital Assembly nokko porikka ra·e nian baksana commission ka·aniko dakanggen aro July ja bon·angachibarade ia gital Assembly nokko jakkalna man·gnok,” ine Lyngdoh aganaha.
Ia sal somoirangoba a·doko COVID man·gipa batrorobataiengahaoba nok rikani kamrangko ja·donggaatjanaba gnang ineba ua an·tangni ka·dongchakenganiko parakataha.
Batanggimin bilsignini gisepo COVID-ni a·selan gital Assembly nokko rikanirang ja·manchakatako man·na nangaha ine janapatengon, “Kamrang ja·manchakatako man·ahani a·sel da·o chinga ia gital nokko matchotatani tarikrangkoba tik ka·taina nangaha indiba anga ka·dongenga ia bilsiode ia nok rikaniko COVID ja·donggaatjawaha,” ine Lyngdoh parakataha.
Ia gital Assembly building-ko New Shillong Township-o donggipa Mawdiangdiang-ni acre 80 ong·gipa a·ao rikengachim aro ia gong kror 127 ong·gipa project-ko Uttar Pradesh sorkarini PSU, Uttar Pradesh Rajkiya Nirman Nigam Ltd-na on·ahachim.
Shillong songjinmani Khyndailad-o donggipa gitcham Assembly nokko 2001 bilsio wa·al kamaonin ru·utbea bilsirangna Meghalaya Legislative Assembly, permanent building-ko man·chipkujaengachim.