NEW DELHI: North Eastern Hill University (NEHU) Tura Campus-o Meghalaya a·dokonisan ong·aigija gipin biaprangoniba chatro chatrirang re·bae poraitokengani gimin chatro chatrirangni namgnina ia campus-o arts aro science-ni pilak course-rangkon on·dapchina gita Tura-ni MP Agatha K Sangma, ma·mong sorkariko didiataha.
Iani bidingo ma·mongni Union Education Minister Dharmendra Pradhan-na sedoatengon, NEHU Tura campus-o poraienggipa chatro chatrirang bilsiantian batrorobaengoba da·onan ia campus-o ge 10 educational department-rangsan dongkuenga aro gipin course-rangko poraina nangnikenggipa chatro chatrirangde gipin biaprangonasa re·ange poraitokna nangenga ine Tura-ni MP parakataha.
Sangma-ni parakatani gitade, Garo Hills-ni songadam nokadamrangoniba chatro chatrirang, ia NEHU Tura campus-ona re·bae poraina cholrangko man·tokpaengachim indiba ia campus-o arts aro science-ni chu·gimik course-rang dongkujaengani a·selan gipin biaprangona re·ange poraipana chol ong·gijagipa chatro chatrirangde chubata gadangrango poraidapna chol ong·tokjaengachim.
NEHU Tura campus-o gapatna nangenggipa kamrangni giminba Agatha, ma·mong sorkarina u·iataha.
NEHU Tura campus-o hostel, auditorium aro medical unit gita dakgipa cholrangan dongkujaenga ine janapatengon, ia campus-ko nambate chalaina man·na gita tangka paisarangko on·dapatchinaba ua ma·mong sorkariko didiataha.
Skigiparang chu·ongjae poraienggipa chatro chatrirang neng·nikanirangko chagrongna nangtokenga ineba Tura-ni MP, bangbang ong·e dongenggipa skigiparangni kamrangko ta·raken gapatchina ma·mongni Union Education Minister-ko didiataha.
NEHU Tura campus-o Kendriya Vidyalaya-ko kulie on·china gitaba Tura-ni MP, ma·mong sorkariko didiataha.
NEHU Tura Campus-na gipin course-rangkoba on·dapchina Agatha mol·mola
Date:
Share post:
