SHILLONG: Meghalaya a·doko so·sojengjeng ong·anirangko nikna man·engoba MDA sorkari, da·onan simsakna gisiko nangjaenga ine Opposition dolko dilgipa Mukul Sangma matnangataha.
“2018 bilsio chinga a·dokna tom·tomaniko ra·baana baksana pilakni gitan namroro silroroani gnangsa MDA sorkarina pakwate on·angahachim indiba da·onan a·dok sorkari, simsakna gisik nangani dongjaenga,” ine Sangma aganaha.
Sangma-ni aganani gitade, a·doko so·sojengjeng ong·anirangko namatani pal MDA sorkari, gipin kamrangosa gisik on·batskaengachim.
“Kamrangko ka·anio ia sorkari gisik on·gija kamrangko ka·enga aro uamang iandake kamrangko ka·angkua ong·ode obostarang namjabatanggen,” ine All India Trinamool Congress (AITC)-ni dilgipa Mukul Sangma aganaha.
Batanggimin jasani gisepon Shillong songjinmao IED bomarangko gopretan baksana petrol pump-rangoniko ra·seke ra·ahani gimin Opposition dolni dilgipa ia kattarangko aganaha.
Shillong songjinmao AK silchidarerangko ra·bite maming kenna gri petrol pump-rangko dakait dakaniara manderangna namen kenchakna nangani ong·enga ineba Sangma aganaha.
Sangma-ni parakatani gitade, a·doko so·sojengjeng ong·anirangko champengna gita ua State Security Commission-ni tom·anirangkoba ong·atchina aganahachim indiba uni agananiko a·dok sorkari knachakjaha.