SHILLONG: Budbar salo Khasi Hills Autonomous District Council (KHADC)-ni MDC sakgni, chong·motan Nongshken constituency-ni MDC Grace Mary Kharpuri aro Laitumkhrah constituency-ni MDC Joseph Fantin Lakadong, National People’s Party (NPP)-o napeaha aro uamangko NPP-ni national president aro Meghalaya a·dokni Chief Minister Conrad K Sangma, NPP-ona rimchaksoaha.
KHADC-ni MDC sakgniko NPP-ona rimchaksoani somoio Conrad Sangma, jinmana aganprakengon, da·ororo bang·a dilgiparangan NPP-ona re·batokengahani gimin 2023 bilsini Assembly election-ode NPP chegope, doltangari sorkariko rikna man·gnok ine an·tangni ka·dongchakenganiko parakataha.
Batanggimin bilsibrina sorkariko rikanio NPP-chi dilenggipa MDA sorkari, neng·nikanirangko aro ra·bianirangko indiba NPP-ni bebera·anian watgalgija jotton ka·anisa ong·ani gimin neng·nikanirangko chagronge kamrangko chu·sokatna man·aha ineba Sangma aganaha.
Ia apsan salon, Jirang constituency-ni gitcham MDC WL Mynsong-ba NPP-o napeaha.
NPP-o napanggipa MDC Joseph Fantin Lakadong-ara Congress dolni MLA Ampareen Lyngdoh-ni segipaba ong·a aro da·o ua NPP-o napangahani gimin Ampareen Lyngdoh-ba NPP-o napangani cholrang gnang ine niksamsona man·enga.