SHILLONG: All India Trinamool Congress (AITC)-oni adita sak Garo Hills-oni MLA-rang National People’s Party (NPP)-ona napania party-na namen jajrengani ong·a. National People’s Party-ni Sonibar salo kobor u·iatani gitade, ‘a·bachengaode AITC-ni sakgnisan NPP-o napna sikgipa dongachim indiba da·ode AITC-ni bang·a MLA-rangan NPP-ona re·bana am·tokenga, ine a·kangataha.
Indiba da·odipet talede agana man·kujaenga, kobor man·soani gitade, ia kobor kakket ong·naba gnang, jeba ong·bo somoi soko tale u·ina man·aigen aro officially parakatgen, ine party official koborna u·iataha.
Bebegita AITC-ni bang·a memborrang NPP-ona re·baa ong·ode, dilgiparang baksa uamangni ground supporter ba chakpagiparangba re·bapagen, ian NPP-na namen dal·bea chu·sokani ong·gen.
Meghalaya Chief Minister aro National People’s Party (NPP), national president, Conrad K Sangma, skangba “Opposition All India Trinamool Congress (AITC)-ni mitam dilgiparang NPP-ona re·bana am·tokenga,” ine parakataha.
Garo Hills-onisan ong·aija, Khasi aro Jaintia Hills-oni AITC dilgiparangba donga, uamang NPP-ona re·bana sikaniko parakaha ineba CM koborna u·iataha.
Uandake Meghalaya AITC-ni be·gruani gimin janapatengon, ‘ia gital party-ni re·mikkangna skangan be·gruaniko nike anga jagokja, maina indaken ong·aigen ine a·bachengaoni u·isoachim ine agandapaha.
Ampati-oni TMC-ni MDC Stevie Marak, jean Leader of Opposition Dr Mukul Sangma baksa kakket ong·e kam ka·gipa ong·achim, uan NPP-o napaha.
