TURA: Meghalaya a·doko 4th teacher ong·e kam ka·enggiparangna dormahako bariatchina aro skigiparangni kam ka·anio pangchake kamrangko regularise ka·china mol·mole, All Meghalaya 4th Teachers Association (AM4thTA) Garo Hills Unit, Meghalaya a·dokni Governor Satya Pal Malik-na sedoataha.
Batanggimin somoirangoba 4th teacher-rangni dormahako bariatchina mol·mole AM4thTA-ni dilgiparang, changni chang a·dok sorkarina aro Education official-rangna sedoatahachim indiba da·onan skigiparangni dabianiko chu·sokate on·kujaengachim ine nikna man·a.
Indian Constitution-o dongimin niamrangni gimin janapatengon, assistant teacher aro 4th teacher-rangni poraiani gadang aro kamrang apsan ong·genchimoba dormaha man·anirangde apsan ong·jaenga maina 2013 bilsini April 1 tarik dipet assistant teacher-rang gong 9000/- dormahako man·ahaoba 4th teacher-rangde gong 6000/-kosan man·aiachim aro 2017 bilsini January 1 tarik dipet SSA assistant teacher sakgittamde gong 20,493/-ko man·engoba 4th teacher-rangde da·onan japrako gong 12,000/-kosan man·engkua ine AM4thTA GH unit parakataha.
“4th teacher-rangni dormahako bariatchina chinga pilak dilgiparangkon changni chang gronge mol·molahaoba da·onan chingni mol·molanirangna sorkari nachil songjaenga aro ia sorkarini, a·doko 4th teacher ong·e kam ka·enggiparangko galchipaniko mesokani gitasa ong·enga,” ine AM4thTA Garo Hills unit-ni president Tengsrang K Sangma parakataha.
Comments are closed.