TURA: Garobadha jolrangona Assam a·dokoni re·bae maming nangchongmotgipa lekkarang gri kamrangko ka·e cha·tokenga ine Garo Students Union (GSU) Garobadha regional unit parakatenba, iandakgipa manderangko am·sandie biaptangtangona watatpilchina sorkari aro police-rangko didiataha.
GSU Garobadha regional unit-ni parakatani gitade, a·doko COVID-ni niamrangko olgrokata intalan dingtang dingtang kamrangko ka·na gita contractor-rang aro gipin bading chiwalgiparang, Assam a·dokrangoniko Garobadha jolrangona rimbaaha indiba ia jolrangona re·bae kamko ka·enggipa bang·bata manderangon maming identity card, labour licence aro Trading for Non-Tribal (TNT) licence-rang donggijagiparangsa ong·achim.
“Uni gimin nangchongmotgipa lekkarang donggijagipa manderangko am·sandie biaptangtangona watatpilchina chinga sorkari official-rangko aro police-rangko didienga,” ine GSU Garobadha regional unit-ni dilgiparang parakataha.
Garobadha jolrango hajira kamrangko ka·e cha·enggipa aro bading chiwale cha·enggipa pilak manderangkon an·tangtangna labour licence aro trading licence-rangko tarie ra·china gitaba GSU didiataha.
“Chingni mol·molani gita sorkari, ja·kurangko de·jagenchimode chinga an·tangtangan, niam gri kam ka·e cha·enggipa manderangko sandina draatako man·gen,” ineba GSU Garobadha regional unit-ni dilgiparang mikrakataha.
Comments are closed.