State Level Horti Exhibition cum Honey Festival-ko ong·ata  

Tura: Sonibar salo Tura, Dakopgre SMELC-o ‘Horticulture for Sustainability and Food Security’-o theme done State Level Horti Exhibition cum Honey Festival-ko ong·ataha, jeon West Garo Hills-ni Deputy Commissioner Ram Singh tom·anio Chief Guest ong·e bakko ra·angaha.
Tom·anio bakko ra·e aganprakataon, Deputy Commissioner Ram Singh, “iandakgipa platform-rang game cha·giparangna namen gamchatgipa ong·a, uamangni ge·e-game man·gipako mesokatna cholko man·a baksana ge·a gamanio maidake technical method ba cholrangko aro marketing skill-rangni bidingo u·ie ra·an cholko on·a,” ine aganataha.
“Uandake horticulture-o bang·bea cholrang donga, uni gimin matchu-matte, wak-do·o jilanirangkoba ra·chimonge kam ka·china didiangaha.
Iarangni gisepon gue game ge·e cha·aniko bang·bata manderangan ra·tokani bidingo  janapatengon, Ram Singh indine aganaha, “beben gue ge·e cha·anio tangka paisakode kra gitan man·a, indiba joltango donggipa ba samtangtango donggipa sam-bolrangko nisiata ge·e-gamaniara namgipa chol ong·skaja. Mikkangchi buring-bolgrimrang bon·angksagnok, una agreba china neng·nikarangko sokgen.”
Meghalaya a·dokara bang·bata bosturangkon gipin biaprangonikosan ra·bana nangenga, niatgenchimode an·chingni a·jalo agitchae a·a donga, jeon manderang integrated farming ba uandakgipa cholrangko jakkale an·tangtangna cha·anirangko ge·na man·gen. Minggipin Garo Hills-o cha·aniko chu·onga gita man·jae be·en bilgrie saaniko bang·e nikna man·a. India a·songo Jharkhand-ni ja·man Garo Hills-an bilgri ong·e sagiparang bang·batanio gnigipa a·dok ong·a. Uni gimin namnamgipa cha·anirangko cha·na nanga.
Uandake District Agriculture Officer aro Incharge District Horticulture Officer Purnima K Sangma-ba tom·anio bakko ra·e aganprakataon, horticulture-ni namgnirangko skie agane on·aha. Unbaksana bijabitchi aro bijabitchioniko tarigipa bosturangni gimin, uarangara an·chingni be·en-bimangna baditan gamchata, iarangni giminba agane on·angaha.
Tom·anio Agriculture-ni Joint Director, Alinaro Ch Momin, Williamnagar District Horticulture Officer, Jitendra Prasad Barma, Additional Deputy Commissioner, West Garo Hills Mary T Sangma, Deputy Director Cum Managing Director MgSFAC, Meghalaya Shillong, P Mukhim, Tura NABARD-ni official  M Dkhar, District Agriculture and Horticulture officers, aro dingtang dingtang department-ni officer-rang unbaksana a·dokoni game cha·giparang bak ra·angtokaha.
Tom·aniko Chief Guest oprakate on·aha. Festival-o dingtang dingtang ge·e-game man·gipa bosturang aro horticulture-ni bosturangko aro bijabitchirangko donaha. Iarangni gisepon sapgipa chadambe music composer, songwriter Mikhail Marak, game cha·giparangko mande ra·na ‘Hai Chena’ gitko ring·angaha.

Get real time updates directly on your device, subscribe now.

Comments are closed.