SHILLONG: Garo Hills-ni damsamangmang Baljek airport-ko oprake on·angaoni da·o bilsi 14 ong·pilengahaoba da·onan ia airport-ko chalaigija galchipe donengkuon, ia airport-ko ta·raken a·bachengatna gita kamrangko ka·engaha ine Mongolbar salo, a·dokni Chief Minister Conrad K Sangma parakataha.
Ia Baljek airport-ko jakkalchipgija donengani gimin Assembly-ni budget session-o Kharkutta-ni MLA Rupert Momin-ni sing·anina aganchakaniko on·angengon, Baljek airport-ni runway-ko kilometre 2.2 bate tarina gita sorkari miksongengani gimin a·a ra·dapani kamrangko ka·engaha ine Chief Minister parakataha.
Iana skang, ia airport-ko taridapna gita sorkario miksonganirang dongama ine Momin-ni sing·anina a·dokni Transport Minister Dasakhiat Lamare aganchakaniko on·angengon, ian a·doko mongsonggipa airport-rangoni damsa ong·ani gimin sorkari, ia airport-ni kamrangko ta·raken matchotate jakkalna jotton ka·enga ine parakataha.
Ia Baljek Airport-na pangchakani ro·ongko 1988 bilsio India a·songni gitcham Prime Minister Rajiv Gandhi-ni songe on·angani ja·man 2008 bilsio a·songni gitcham President Pratibha Patel a·bachengate on·angskaahachim indiba ia airport-ni runway bakkandikani a·sel ia airport-ko da·alona kingkingan jakkalna gita man·chipkujaengachim ine nikna man·a.
Indake ong·engon, Baljek airport-ode Shillong-ni Umroi airport-o gita sambao dal·dalgipa a·brirang dongjani gimin mikkangchi airport-ko chalaianio maming neng·nikanirang dongjawa ine Chief Minister parakataha.
Meghalaya a·doko bolsni aeroplane-rangko chalaina India sorkarioni subsidy-rang dongama ine Malwai-ni MLA PT Sawkmie sing·skaon, a·doko chalaienggipa pilak aeroplane-rangkon UDAAN scheme-ni ning·o Ministry-ni gitasa chalaienga aro Shillong-oni Delhi-ona watenggipa aeroplane-osan a·dok sorkaride bak dongpaaia ine Transport Minister parakataha.
Meghalaya a·dokoba international flight-rangko a·bachengatchina gita dingtang dingtang MLA-rangni agangipa kattarangna aganchakaniko on·angengon, a·doko international flight-rangko a·bachengatna gitade, Shillong-Umroi airport-ko International Airport ine parakchengna nanggen ine Sangma talataniko on·angaha.