SHILLONG: Byrnihat-o donggipa Conservation Training Institute-o skie ra·e pass ka·anggipa sak 18 manderangna mande ra·pilskaaniko dakna gita Sukrobar salo Soil & Conservation department-ni gita passing out ceremony-ko Byrnihat-ni CTI Auditorium-o ong·atangaha.
Ia program-ko ong·atanio Soil & Water Conservation-ni Secretary Dr Joram Beda, mongsonggipa sokgipa ong·e jinmana aganprakangengon, 2021 bilsini April jaoni ia 2022 bilsini March jaona ja 11-na training-ko ra·e pass ka·anggipa manderangna an·tangni namgipa skaniko parakatenba, an·tangtangni department-rango kamko ka·e a·dokna aro a·dokni manderangna kakketo dangdike on·angchina gita didiangaha.
Training-rango pass ka·gimin manderangan department-ni gam-jinrang gita ong·a ine janapatengon, an·tangtangni skie ra·gimin u·i-ma·sianirangko jakkale, samtangtango ong·telaigiparangko ripingna bamao aro kakketo dangdike on·china gita Dr Beda didiangaha.
2021-22 bilsini session-o biming segate training ra·anggipa sak 18 manderangoni sak 15-de Assam Soil Conservation Department-ni, sak 2-de Arunachal Pradesh-oni saksade Soil & Water Conservation (T) Division Resubelpara-oni ong·achim.
Ia training-o donge dingtang dingtang subject-rango bang·bate mark man·giparangna, kal·susaanirango teng·sugiparangna aro attendance nambatgiparangna dingtangmancha trophy aro certificate-rangko on·angjolaha.
Ia program-ko ong·atanio dongpae jinmana aganprakanggipa gipin manderangara, Soil & Water Conservation-ni Director I Rynjah, CTI Byrnihat-ni DSW/Sr Insrtuctor M Diengdoh, CTI Byrnihat-ni Joint Director PP Lyngdoh aro gipinrang ong·a.