ALS-ni gita jatni doka dam·ani bidingo workshop-ko ong·atenga

By U'IATTIMGIPAONI On Mar 24, 2022

A·chik Literature Society aro NEHU Tura Campus-ni ning·o donggipa Garo Department-ni nangrime ong·atenggipa workshop-o bak ra·enggipa chatro chatrirang.

TURA: A·chikrangni dokna dam·na jakkalgipa ma·manti bosturang, jekai dama, sarenda, dotdrong, chigring aro bangsirangko dokna dam·na aro tarina gita skie on·na re·anggipa March 21 tarikoni March 25 tarikona A·chik Literature Society (ALS), North Eastern Hill University (NEHU) Tura campus-ni Garo Department baksa nangrime, regional workshop-ko NEHU Tura campus-o ong·atenga.

A·chik Literature Society aro NEHU Tura Campus-ni ning·o donggipa Garo Department-ni nangrime workshop-ko ong·atenggipao chatro chatrirangna chigring dokna skie on·enga.

Ia workshop-o NEHU Tura campus-ni Garo department-o poraienggipa chatro chatrirang baksana Tura Don Bosco College, ICFAI University, Williamnagar Government College, Tura Christian College, Tura Sherwood School aro Captain William School-ni gimik sak 109 chatro chatrirang donge skie ra·enga.

Ia workshop-ko ong·atanio jatni dingtang dingtang doka dam·anirangko dokna dam·na aro tarina skie on·engan baksana Wangala chrokanikoba chatro chatrirangna skie on·enga.

Ia workshop-o donge skie ra·enggipa sak 109 chatro chatrirangoni sak 36-de chatrorang aro sak 73-de chatrirang ong·a aro uamangna skie on·enggiparangara Selbalgre-oni Ringjeng T Sangma aro Sotjak Ch Marak, Rombagre-oni Dewal M Sangma aro Lindinbirth S Sangma, Gondenggre-oni Dirot Ch Marak aro Silgra Ch Marak, aro Raksamgre-oni Tengchon R Marak ong·a.